Барлык яңалыклар
Общие статьи
14 август 2019, 16:51

ТАБИГАТЬНЕҢ КИСӘТҮЕМЕ БУ?..

Башкортстанның Әбҗәлил, Баймак, Зилаер, Куергазы, Стәрлебаш һәм Хәйбулла районнарында гадәттән тыш хәл игълан ителде. Сәбәбе – бу алты районда май-июль айларында яңгырлар бөтенләй дә яумаган. “Корылык һәм эссе җилләр басулардагы үсентеләргә үсәргә ирек бирмәде, быел бу басулардан уңыш көтәсе, урып-җыю эшләрен башкарып та торасы юк”, — ди мондагы аграрийлар. Гадәттән тыш хәл кертелү турындагы Карарга республика җитәкчесе вазыйфасын башкаручы Р.Хәбиров кул куйды. Гадәттән тыш август ае ахырына кадәр дәвам итә.

Башкортстан Авыл хуҗалыгы министрлыгы белгечләренә авыл хуҗалыгы культураларының юкка чыгуыннан күрелгән зыянны кире кайтару өчен материаллар җыеп, РФ Авыл хуҗалыгы министрлыгына тапшырырга кушылды.

Ә республиканың башка төбәкләрендә яңгырлар озакка китеп, уңышны җыеп алуга комачаулый. Табигатьнең усал шаяртуымы бу, кешеләрне кисәтергә теләвеме?..

Р.Арсланова әзерләде.


Фото: ачык чыганак.


Читайте нас в