Алар Мәскәүгә барачак!

Үткән атнада Уфада «Поколение.Ru» III Халыкара фестиваль-конкурсы үтте. Балалар филармониясендә оештырылган бу бәйгедә сәләтле башкаручыларны ачыклау һәм аларның сәләтен артабан үстерү, талантларга ярдәм итү, конкурста катнашучыларны халыкара хезмәттәшлек программаларына җәлеп итү һәм иҗади бәйләнешләр булдыру максаты белән үткәрелгән бу чарада республиканың һәм Русиянең барлык төбәкләреннән, шулай ук якын чит илләрдән дә балалар катнашты. Анда төрле жанрларда 100дән артык номер тәкъдим ителде. Конкурсантлар хореография, вокал, театр һәм цирк осталыгы, инструменталь осталык һәм модалар театры номинацияләрендә көч сынашты.

Бу мәртәбәле зур чарада яшь райондашларыбыз да катнашты. Балалар иҗат үзәгенең мода һәм стиль студиясендә Луиза Федрат кызы Мифтахова җитәкчелегендә шөгыльләнгән укучылар өчен әлеге бәйгедә катнашу аеруча уңышлы булды. Алар “Агыйделнең кристалл төсе” ("Кристальный цвет Агидели”) коллекциясе белән “Модалар театры” номинациясендә җиңүче булды һәм I дәрәҗә лауреат исемен яуладылар. Аларга шулай ук ил күләмендәге конкурска чакыру да тапшырылды.

Җиңүче яшь райондашларыбызны киләсе елның март аенда ил башкаласында үтәчәк “Мәскәү вакыты” (“Московское время”) Халыкара конкурс-фестивалендә көтәләр.