Районыбыз матур тәэссоратлар калдырды

Башкортстанның 100 еллыгы хөрмәтенә муниципаль берләшмәләр фестиваль-марафоны бара

Башкортостан Республикасы Башлыгы Радий Фәрит улы Хәбиров Грантына республикабызның 100 еллыгы уңаеннан игълан ителгән муниципаль берләшмәләр фестиваль-марафоны тәмамлануга бара. 8 ноябрьдә башкалабыздагы Хөсәен Әхмәтов исемендәге Башкортстан дәүләт филармониясе бинасында аның кысаларында районыбыз фестиваль эстафетасын кабул ите. Бу чарага районыбызның барлык хуҗалыклары, оешма-учреждениеләре, предприятиеләре вәкилләре, киң җәмәгатьчелек дәррәү кузгалып килде. Башкалада гына түгел, башка шәһәр һәм районнарда яшәүче якташларыбыз, күренекле шәхесләребез дә, шулай үк районыбыз белән кызыксынучы кешеләр дә күп җыелды. Районыбыз гына түгел, республикабыз һәм илебез күләмендә горурланырлык шәхесләребез күп безнең. Аларның зур күпчелегенең дә фестивальгә килүе, якташлары-замандашлары белән аралашуы бу чараның мәртәбәсен арттыра төште. Якташыбыз, Иске Ихсан авылында туып-үскән, гомере буена туган җиренә игелекле хезмәт күрсәтеп торучы хөрмәтле шәхес – Уфа шәһәре округы хакимияте башлыгы Өлфәт Мансур улы Мостафин, муниципаль район хакимияте башлыгы Реканс Фәнил улы Ямалеев, Башкортстан Республикасы Дәүләт Җыелышы – Корылтай депутатлары Вадим Васильевич Соколов һәм Ирек Марс улы Усманов, республикабызның төрле ведомстволарында җитәкче вазыйфаларда эшләүче һәм өстәп әле хаклы ялда булган хөрмәтле якташларыбызны берләштергән төркем әгъзалары иң тәүдә күргәзмә экспозицияләре белән танышты. Филармония бинасы фойесында районыбыз предприятиеләре, учреждениеләре, оешмалары, хуҗалыклары, эшкуарлык структуралары бай күргәзмә әзерләп күрсәтте. Беренче залда район кулланучылар җәмгыяте (җитәкчесе Фәндидә Әүхәт кызы Галләмова) бай азык-төлек продукциясе ассортиментын, шәхси эшкуарлар Рина Раян кызы Гәрәева (“Лакомка” кибете) – тортлар һәм кондитер эшләнмәләре, Галина Васильевна һәм Наталья Мәгърүф кызы Кульковалар (“Подиум” штора һәм тюльләр салоны) – ашсу бүлмәсе экспозициясен, Марат Глүс улы Миңнегалиев (тимердән чүкеп эшләнгән әйберләр), Азат Эльвир улы Гатауллин (гипстан бакча сыннары, статуэтка һәм башкалар), Илнур Рәфил улы Имаев – ысланган ит ризыклары тәкъдим итте. Күргәзмәдә боларны тәмләп карау һәм сатып алу мөмкинлеге дә булды, Чакмагыш җиренең тәмле әйберләрен күпләп һәм бик теләп сатып алып беттеләр. Биредә үк “Русия Почтасы” федераль дәүләт унитар предприятиесе һәм Чакмагыш мәгълүмат үзәге хезмәткәрләре матбугат басмаларына язылырга теләүчеләрне хезмәтләндерделәр. Эчке залга кергән урында район мәдәният хезмәткәрләре кадерле кунакларны дус-тату яшәүче халыклар телендә сәламләп, икмәктоз, чәкчәк һәм милли эчемлекләр тәкъдим итте. Муниципаль район хакимияте башлыгының кадрлар һәм социаль мәсьәләләр буенча урынбасары Светлана Фларис кызы Шакирова һәр экспозиция белән таныштырды, оешма-учреждениеләр ирешкән уңышларны бәян итте. Авыл мәдәният йортлары һәм район хакимиятенең мәдәният бүлеге башкорт авылы этноихатасы күренешен тәкъдим итте. Бәйләмчигү өлгеләре, традицион эш кораллары күргәзмәсендә курайчы Рөстәм Дәлха улы Гомәровның халык көйләрен башкаруы астында Фәйрүзә Фәүзән кызы Гәрәеваның йон эрләп утыруы җанлы күренеш тудырды. Балалар иҗат үзәге, гимназия һәм беренче урта, балалар сәнгать мәктәбе экспозицияләре дә кунакларда чагу тәэссоратлар калдырды.