Уңышлар тырышлык белән яулана

Ю. Гагарин исемендәге кубокка укучылар олимпиадасы безнең республикада 2011 елдан башлап уңышлы үткәрелә һәм анда катнашучылар саны елдан-ел арта бара. Бу укучыларның да, укытучыларның да кызыксынуы турында сөйли. Укучыларның Бөтенрусия олимпиадасына тиңләштерелгән Ю.А. Гагарин исемендәге Кубокка олимпиада Башкортстан укучылары алдында интеллектуаль, спорт һәм иҗади аспектларда үсеш өчен гаять зур мөмкинлекләр ача.

Башкортстан Республикасы Башлыгы Р.Ф. Хәбировның сүзләренә караганда, “безнең республикада чын-чынлап талантлы, сәләтле балалар күп. Без республикада аларның потенциалын гамәлгә ашыру һәм үстерү өчен барлык шартларны тудырырга тиеш. Безгә Гагарин олимпиадасы кебек проектлар кирәк. Бу, мөгаен, Башкортстанда иң популяр, дәрәҗәле һәм югары дәрәҗәле мәгариф проектыдыр...”

Чакмагыш гимназиясе инде бишенче ел рәттән Олимпиадада актив катнашып килә һәм алдынгы позицияләрне били. Бу уку елында гимназиянең 1-8 сыйныфларында белем алучы 526 укучы катнашты.

  23 майда Уфада БР “Торатау” конгресс-холлында  Башкортстан Республикасы шәһәрләренең һәм районнарының Ю.А. Гагарин исемендәге Кубогына иң яхшы мәктәпләрне бүләкләү тантанасы узды. 2021-2022 уку елы олимпиадасы нәтиҗәләре буенча республиканың 60тан артык муниципаль районы һәм шәһәр округы мәктәбе иң яхшысы дип табылды һәм беренче космонавт Юрий Алексеевич Гагарин бюсты һәм Дипломы белән бүләкләнде.  Республиканың дәрәҗәле мәктәпләре янәшәсендә иң яхшы мәктәпләр арасында  Чакмагыш   гимназиясе дә булуы аеруча куанычлы. Бишенче Диплом һәм Ю.А. Гагарин бюсты гимназия фойесын бизәячәк.

Олимпиада хәрәкәтен үстерүгә керткән өлеше, Ю.А. Гагарин исемендәге Кубокка олимпиада кысаларында белем бирү-патриотик проектларны тормышка ашырудагы уңышлары өчен гимназия директоры Илдус Фидус улы Шәйдуллин Русия космонавтика федерациясеннән “Ю. А. Гагарин” медале белән бүләкләнде.

Бүләкләү тантанасында шулай ук олимпиаданың региональ этабы призерлары булган 13 гимназия катнашты. Сынауның өч этабын (мәктәп, муниципаль һәм республика) узып, алар финиш сызыгына чыктылар. Алар 1-2 сыйныф укучылары – Данил Шәйхуллин, Данияр Мәһәдиев, Динияр  Мәһәдиев,  Аяз Мөхәммәтҗанов,  5 сыйныф укучысы –  Ильяс Байгускаров, 6 сыйныф укучылары – Ильяс Сакаев, Азалия Меньшенина, Июлия Әхмәдиева, Әмир Шәрипов, 7 сыйныф укучысы  Алина Вәлиева,   8 сыйныф укучылары – Ринат Бәдертдинов, Шамил Ваһапов, Алмаз  Байбаков.  Барлык укучыларга да Дипломнар, истәлекле медальләр тапшырылды. Афәрин, балалар! Сезне котлыйбыз һәм киләчәктә дә уңышлар телибез!

Гимназия үзенең педагогик, укучылар һәм ата-аналар коллективы, укучылары белән горурлана, традицияләрен дәвам итә һәм арттыра, киләчәккә ышанычлы карый!