Басу эшчәннәренә – мәдәни бүләк

Быел да, уракның иң кызу мәлендә, агитбригада туган авыл басуында солы уңышын җыючы механизаторлар янына мәдәни программа белән барды. Игенчеләр китапханәче Мәрьям Смакова укып ишеттергән райондаш каләм осталарының якташларыбыз һәм туган җиргә багышланган шигырьләрен тыңлап кинәнделәр. Үзешчәннәр башкаруындагы моңлы җырлар һәм дәртле биюләр тырыш хезмәткә илһамландырып, күңелләргә дәрт өстәде. Басу түрендә барган мәдәни тамаша ил табыны муллыгын тәэмин итүче иң мөһим һәм мактаулы хезмәт ияләре – игенче-механизаторларга ихлас изге теләкләр белән тәмамланды. Басу эшчәннәре үз чиратларында агитбригада әгъзаларына күңелле ял минутлары бүләк иткән өчен ихлас рәхмәт сүзләрен җиткерделәр.