Дуслык һәм мәдәни бердәмлек җепләрен ныгытып

  Бу кичне сәхнәне Тайняш, Каран, Яңа Бирде, Яңа Коты һәм Чакмагыш авылларыннан җыелган мәдәният хезмәткәрләре һәм үзешчәннәре чыгышлары бизәде. Алкышлар, эчкерсез елмаюлар һәм тулы тамаша залы – болар барысы да алар хөрмәтенә иде. Бәйрәм программасын җанлы һәм  эчтәлекле итеп  Рузилә Нәфыйкова алып барды. Ул һәр номерны сәхнәнең чын энҗесенә әйләндерде. Кичәнең иң көтеп алынган һәм искиткеч өлешләреннән берсе – ялгыз бию номерлары булды. Искиткеч биюче Гүзәл Батыеваның чыгышы тамашачыларда аеруча соклану уятты! Аның грациясе, сәхнә осталыгы һәм кабатланмас пластикасы залны ялкынлы энергия белән тулыландырды. Җырчылар  Урал Шәяхмәтов, Илдар Хәмидуллин, Гөлзинә Вәлиәхмәтова, Рифир Галиуллин, Гүзәл Харисова һәм Рида Сәлимова тамашачыларга онытылмаслык шатлык минутлары бүләк иттеләр. Алар кабатланмас тавышлары һәм күңел җырлары белән тамашачыларның йөрәкләрен җылыттылар. Ә яраткан якташыбыз Илдар Фәрраховның чыгышын тамашачылар аерым бер дулкынлану һәм җылылык белән каршы алдылар –   аның җырына бөтен зал җырлады һәм биеде.          Бу матур вакыйга авылларыбызны тагын да ныграк берләштерде, дуслык һәм мәдәни бердәмлек бәйләнешләрен ныгытты. Чын күңелдән артистларыбызга бетмәс-төкәнмәс илһам, иҗади уңышлар һәм сәхнәдә яңадан-яңа биеклекләр телибез.