“Халкыбызның тарихи хәтеренә хаҗ кылдым”

Әлеге масштаблы чарада Үрнәк авыл биләмәсе хакимияте башлыгы, районыбыздагы дуван ыруы рәисе Рәсимә Дамир кызы Зәйнетдиновага да катнашу бәхете елмайды. Ул чарадан алган тәэссоратлары белән гәзитебез битләрендә  уртаклашты.

“Бу эш сәфәре генә түгел, ә халкыбызның тарихи хәтеренә чын хаҗ кылу булды. Салават районы үзәге Малаязда безне район хакимияте башлыгы, аның урынбасарлары каршы алды һәм без Салават Юлаев музее ихатасында аның һәйкәленә чәчәкләр салдык. Башкортстанның атказанган артисты Хөрмәтулла Үтәшев "Яу" шигырен укып ишеттерде. Артабан  "Янгантау" геопаркына юл тоттык. Бу көн башка ыру башлыкларының докладларын тыңлау, уникаль шәжәрәләрне өйрәнү, уртак мәсьәләләрне хәл итү буенча фикер алышу көне булды.

Икенче көн “Тынычлык һәм изге хәтер көне” исеме астында  узды. Без бөек шагыйребезнең туган җиренә  –  Рәми Гарипов музеена килдек. Шагыйрнең туган йортында экскурсия ясагач, шигырьләрен тыңладык. Аннары  "Салават җире"   тарихи-мемориаль комплексына күтәрелдек.

26 сентябрь милли героебыз Салават Юлаевның йөрәге тибүдән туктаган көн ул. Кенотаф янында таш тирмәдә тору, чәчкәләр салу һәм батыр өчен дога уку  күңелебезгә тирән үтеп керде.

Салават җирендә без Бөтендөнья башкорт Корылтае делегатлары һәм «Янган тау» генераль директоры Альфред Акбашев белән бергә «Яшел Башкортстан» республика акциясенә дә  кушылдык. Батыр җиренә яшь агач үсентеләре утырттык. Агач тамырларын тирәнгә җибәрә, ә ботакларын күккә тарта – нәкъ халкыбыз ата-баба васыятьләрен саклаган һәм киләчәк буынны кыю үстергән сыман.

Салават районынан бай рухи бердәмлек тойгысы белән кайттым. Чын күңелдән оештыручыларга тере тарихка кагылу, заманнарның какшамас бәйләнешен һәм башкорт рухының куәтен тою мөмкинлеге өчен рәхмәт белдерәм!