Башкортстанның иң яхшы остазы – безнең районда

18 майда Уфадагы күп профильле һөнәри колледжда “Башкортстан Республикасының белем бирү оешмаларында остазлыкның нәтиҗәле тәҗрибәләре” дип исемләнгән республика конкурсы җиңүчеләрен һәм лауреатларын бүләкләү тантанасы булды.
Конкурста республиканың төрле шәһәр һәм районнарыннан 312 педагог катнашты. Аларның иң алдынгылары җиңүче булды, бу көнне иң лаеклы остазлар хөрмәтләнде. Бәйге җиңүчеләренә Башкортстан Республикасы Мәгариф һәм фән министрлыгының ведомство бүләкләрен министрның беренче урынбасары Илдар Марат Мәүлетбердин тапшырды. Бүләкләүгә тәкъдим ителгән номинацияләр арасында – “Остазлыкның иң яхшы программасы”, “Остазлардан лайфхаклар”. “Остазлыкның иң яхшы тәҗрибәсе”.
Жюри әгъзаларының ачык тавыш бирүе нәтиҗәсе буенча якташыбыз – Чакмагыш беренче урта мәктәбенең башлангыч сыйныфлар укытучысы Рәзимә Исмәгыйль кызы Мостафина конкурсның абсолют җиңүчесе булды. Ул бу мәртәбәле исемгә республика конкурсының өч этабын уңышлы узып лаек булды.
Беренче этапка видеодәрес тәкъдим ителде. Аның барышында педагог кече яшьтәге укучыларга белем һәм тәрбия биргәндә санлы технологияләрнең нәтиҗәлелеген исбатлады. Икенче этапта остазлык тәҗрибәсен һәм мөгаллимлек осталыгы казанышларын тәкъдим итәргә кирәк иде. Икенче этапның беренче сынавы йомгаклары буенча 13 җиңүче һәм 30 лауреат билгеләнде.  Җиңүчеләр икенче этапның икенче сынавында катнашу хокукына ия булды. Икенче этапның бу сынавы остазлыкның көнүзәк темаларына багышланган түгәрәк өстәл форматында үтте. Анда конкурсантларны бәһалау өчен остазлык эшчәнлеген билгеләүче норматив хокукый документларны яхшы белү, укытучылар белән алып барылган остазлык эшчәнлегенең максатка ярашлы һәм системалы булуы, остазның укучылары булган педагогларның югары казанышлары, һөнәри осталык һәм башка конкурсларда катнашу, остазлыкның уңай тәҗрибәсен киңкүләм тарату, остазлык программаларын тормышка ашыруның уңай нәтиҗәләрен дәлилләүче өстәмә мәгълүматлар, конкурсантның аралашу һәм тел мәдәнияте, рухи кыйммәтләргә юнәлеш һәм шәхсән позиция төп критерийлар булып торды.
Өченче этап йомгаклары буенча талантлы укытучы һәм остаз Рәзимә Исмәгыйль кызы лидер булды. Аның ачык дәресләре, осталык сәгатьләре, үткәргән чаралары, чыгышлары, укучыларының югары казанышлары турында районыбызда һәркем белә. Аның укучыларының ата-аналары педагогның югары һөнәри осталыгын, игътибарлылык, җаваплылык, урынлы таләпчәнлек, күңел яктылыгы, балаларга мәхәббәт кебек сыйфатларын аерым билгели.
Чакмагыш беренче урта мәктәбендә остазлык буенча эшчәнлек 2020 елдан башлап актив алып барыла. Остазлар клубында иң тәҗрибәле укытучылар һөнәри осталык серләре белән уртаклаша. Рәзимә Исмәгыйль кызы мәктәптәге һәм райондагы хезмәттәшләре белән һөнәри дәрәҗәдә эшчәнлеккә һәрчак әзер. Ул районда гына түгел, республика күләмендә методик яктан ныклы белемле һәм югары һөнәри осталыкка ия булган педагог буларак танылуга иреште. Рәзимә Исмәгыйль кызы 2019 елдан ук “Башкортстанның ел укытучысы” бәйгесенең зур жюрие составында эшли. Ул Чакмагыш беренче урта мәктәбенең педагогик коллективының хуплавын һәм бердәм эшчәнлеген, муниципаль район хакимияте мәгариф бүлегенең һәм муниципаль район хакимиятенең ярдәмен тоеп эшләвен билгели.
Без Рәзимә Исмәгыйль кызын “Башкортстан Республикасының белем бирү оешмаларында остазлыкның нәтиҗәле тәҗрибәләре” республика конкурсының абсолют җиңүчесе булуы белән ихлас күңелдән котлыйбыз. Безнең хезмәттәшебез – республиканың иң яхшы педагогларының берсе, чын мәгънәсендә остаз, үз эшенең остасы. Без районыбыз педагоглар җәмгыятенең профессионалын тәкъдим итүе белән горурланабыз. Рәзимә Исмәгыйль кызына

чын йөрәктән ныклы сәламәтлек, гаилә иминлеге һәм ирешелгән казанышларда тукталып калмавын телибез. Һәрвакыт беренче булыгыз!