1942 елның нәкъ шушы көнендә Сталинград янындагы каты бәрелештә кызылармиячеләр артиллерия ярдәмендә, немец-фашист гаскәрләрен тар-мар итүгә ирешә. Дәһшәтле ул дәвердән соң төрле үзгәрешләр, исем һәм даталар алмаштырулар булса да, ноябрьнең һәр өченче якшәмбесендә ракета һәм артиллерия гаскәрләрендә хезмәт иткән егетләр җыелышып, армиядә хезмәт иткән чакларын искә ала, яшьлек хәтирәләрен барлый.

Хәрби бәрелешләрдә ракетачылар һәм артиллерия хаклы рәвештә “сугыш Алласы” дип атала, чөнки алар бик күп бурычларны үтәргә ярдәм итәләр. Күркәм гадәт буенча, бу төр гаскәрләр ветераннары булган якташларыбыз истәлекле көннәрен хәрби техника парады белән башлап җибәрде.  Арытаба бәйрәмгә җыелучылар район үзәгендәге Җиңү паркына юлланды. Тантаналы митингта муниципаль район хакимияте башлыгы урынбасары Светлана Фларис кызы Шакирова, хәрби комиссар Альберт Хәниф улы Хәбиров, ракетачы-артиллеристларның инициатива төркеме җитәкчесе Радик Рәүф улы Бикмурзин, “Юнармия” хәрәкәте вәкилләре, “Шәйморатов сыйныфы” укучылары һәм Туган илебез тарихына битараф булмаган якташларыбыз катнашты.

         Бәйрәм митингы мәңгелек ут янына чәчәк гөлләмәләре, ал канәферләр салудан, яу кырларында баш салган батырларыбыз истәлегенә бер минут тын торудан башланып китте. Тантаналы чарада чыгыш ясаучылар ракета гаскәрләре һәм артиллерия гаскәрләренең илебез иминлеген саклаудагы өлешен, аның данлы тарихи юлын тасвирлады, кораллы көчләрнең әлеге төрендә хезмәт салган ир-егетләребезне истәлекле көннәре белән тәбрикләде, үзләренә һәм гаиләләренә иң изге теләкләр юллады.

         Радик Рәүф улы башкаруындагы “Киек каз юллары” җыры барлык элекке хезмәттәшләренә булган чиксез хөрмәт һәм ихтирам, Украина территориясендәге махсус хәрби операциядә катнашучы якташларыбызга кайнар сәлам булып яңгырады. Арытаба бәйрәмдә катнашучылар “Гаилә” кинозалында хәрби-патриотик фильм карады. Дөньябыз тынычланып, махсус хәрби операция зонасына мобилизацияләнгән һәм контракт буенча хезмәт иткән кыю егетләребезнең исән-сау әйләнеп кайтуларын теләп, кичтән муниципаль базар янындагы мәйданда артиллерия залплары яңгырады.

Артиллерия һәм ракета гаскәрләрендә хәрби хезмәт үткән хөрмәтле якташларыбыз! Һәммәгезне дә бәйрәмегез белән ихлас тәбриклибез, барыгызга да сәламәтлек, бәхет-шатлыклар, имин тормыш телибез.