“Бу юлны һәр егет үтергә тиеш”

– Айнур, үзең белән безне таныштырып үтәле.
– Мин Буздәк районында тусам да, Чакмагыш җире миңа бик якын һәм кадерле. Әлеге хозур табигатьле районның М. авылында минем балачагым үтте. Мәктәп еллары, имтиханнар, беренче мәхәббәт... 9 сыйныфны тәмамлагач, Башкортстан аграр-технология колледжы филиалында гомуми төзелеш эшләре остасы һөнәрен үзләштердем.
– Белемеңне арттыру өчен тагын да югарырак уку йортына керү теләгең булдымы?
– Әйе, әмма, башта мин Ватаным алдында изге бурычымны үтәргә булды. Минемчә, һәр егет солдат каешын буып, аның юлын үтәргә тиеш. Армиядә хезмәт иткән егетләр элек-электән дәрәҗәле булган. 2017 елда мин РФ Кораллы Көчләренә юл тоттым һәм бер ел хәрби хезмәттә булдым.
– Армия сафларында хезмәт иткәннән соң, чын ир-егетләр булып кайттың инде.
– Әйе, кайткач та туган авылымда авыл хуҗалыгына эшкә кердем. Татарстан Республикасының Яр Чаллы якларында да водитель булып бераз хезмәт салдым. Ләкин, Чакмагыш үзенә тартты – әйләнеп кайтып, авыл хуҗалыгында яраткан эшемне дәвам иттем
– Хәрби операция башлануны турында ишеткәч нинди уйлар кичердең?
– Ул хакта белү белән мин үземә туган илемне якларга барырга сүз бирдем. Үз-үземне моңа алдан әзерләп, бар көчемне тупладым. 2022 елның сентябрь аеннан хәрби хезмәткәр статусы алып, махсус хәрби операция зонасында бурычларымны үтим.
– Айнур, ялга ничә тапкыр кайттың?
– Туганнарым, якыннарым янына бу минем икенче тапкыр кайтуым. Алар мине һәрвакыт зарыгып көтеп ала. Без гаиләдә алты бала. Бер-беребезне хөрмәт итеп, авыр минутларда ярдәм итеп яшәргә өйрәнгәнбез. Бу ялга кайтканда мәктәпкә укучылар белән очрашуга бардым. Алар мине бик җылы кабул итте.
– Өйләнергә җыенмыйсыңмы соң әле? Сөйгән ярың бармы?
– Әйе, сөйгәнем Илвина белән (исеме үзгәртелде) без инде 3 ел очрашып йөрибез. Беренче тапкыр кыска вакытлы ялга кайткач мин аңа тәкъдим ясадым. Ул ризалыгын бирде.
– Айнур, әңгәмәң өчен рәхмәт. Махсус хәрби операция тиз арада тәмамланып, сиңа исән-имин туган якларыңа әйләнеп кайтып, сөйгән ярың белән кавышып, күркәм гаилә корып, бәхетле булуыңны телибез!