Террорчылыктан сак һәм уяу булыйк!

26 мартта Иске Калмаш модельле китапханәсендә китапханәчеләр һәм авыл мәдәният йорты хезмәткәрләре, Иске Калмаш авыл хакимиятенең 1нче категорияле белгече Алсу Алмаз кызы Кудашева белән берлектә «Террорчылыксыз киләчәк, киләчәксез террорчылык» дип исемләнгән танып-белү сәгате үткәрделәр. Әңгәмәдә катнашучылар террорчылыкның нәрсә икәнен, аның төрләре һәм максатлары нинди булуы турында белделәр.
Чара барышында өлкәннәр һәм балалар террорчылык тарихына күз салдылар, соңгы елларда дөньяда кылынган террор гамәлләрен искә төшерделәр. Балаларга һәм әти-әниләргә террорчылык янаганда үз-үзеңне тоту кагыйдәләрен белү, шундый катлаулы очракларда үзеңне ничек тотарга кирәклеге турында сөйләделәр. Террорчылык янаганда үз-үзеңне тоту кагыйдәләренә, шикле әйберләрне табуга аерым игътибар бирелде, гражданлык уяулыгын күрсәтүнең мөһимлеге, террорчылыкка ничек каршы торырга һәм мондый хәл килеп чыкканда үзеңне һәм якыннарыңны ничек сакларга кирәклеге турында җентекле мәгълумат бирелде.
Чарага “Русия террорга каршы!” дип аталган күргәзмә әзерләнде. Анда тәкъдим ителгән материаллар террорчылыкның нәтиҗәләре, корбаннары һәм рәхимсезлеге турында җентекләбрәк белергә мөмкинлек бирде. Очрашу ахырында яңа буын китапханә хезмәткәрләре укучыларга һәм әти-әниләргә «Террорчылыкка каршы тору», «Террорчылык – җәмгыятькә янау» белешмәлекләрен тараттылар.