Чакмагышта Халыкара балаларны яклау көненә багышланган күңелле бәйрәм үтте

Әлеге чараның максаты – беренче чиратта, өлкәннәргә һәр сабыйның балачагы бәхетле булырга тиешлеген искә төшерү, балаларыбыз бу көнне генә түгел, ә ел әйләнәсе кайгыртуга һәм игътибарга лаек икәнлеген ассызыклау. Кояшлы, җәйге иртәдә әти-әниләрен, нәнәй-картәтиләрен, апа-абыйларын кулларыннан җитәкләгән бала-чага бу көнне бәйрәм барган парк мәйданына ашыкты. Биредә алар өчен төрле күңелле, хәрәкәтчән уеннар, осталык дәресләре, матур концерт оештырылды. Шулай ук кызлар һәм малайлар өчен фотозонада истәлеккә фотосурәткә төшү, бәйрәмдәге сәүдә итүчеләрдән төрле тәмлекәчләр сатып алып, сыйлану мөмкинлеге дә булды.