Юлларда эшнең кызу мәле

Шушы көннәрдә юл хезмәткәрләре Кушнаренко-Чакмагыш-Бакалы юнәлешендә барлыкка килгән чокырларны ямый. Бу юллардан бертуктамый авыр йөк машиналары да узып тора, бу да юл торышына нык тәэсир итә. Технологиягә килгәндә, гадәттәгечә чокыр урынын тигезләп кисеп, өрдереп әзерлиләр, аннары аңа асфальт салып тигезлиләр, катоклыйлар.
«Башкиравтодор» җәмгыятенең Чакмагыштагы филиалы начальнигы Марат Тәлгать улы Мусин белән район үзәгендә юлларның торышы турында әңгәмәләшеп алдык. Бүгенге көндә бригадалар юлларны тәртипкә китерү буенча актив эшчәнлек алып бара. Рөстәм Хәкимов җитәкчелегендәге юлчылар бригадасы юлларда барлыкка килгән чокырларны ямау буенча эшне дәвам итә. Икенче бригада хезмәткәрләре юл, знак һәм павильон буйларын чүп үләннәреннән тазарту буенча җиң сызганып эшли.