Баллы да, тәмле дә, шифалы да бәйрәм!

Бүген район үзәгенең Гаилә ялы паркы мәйданы чын мәгънәсендә бал корты оясын хәтерләтте, чөнки монда матур традициягә әйләнгән чараларның берсе – бал бәйрәме узды. Әлеге күркәм чара районның умартачыларын да, бал яратучыларын да үзенә туплады. Биредә балның ниндиләре генә тәкъдим ителмәде! Чәчәк балы дисеңме, карабодайныкымы, юкәнекен яратасыңмы – бал яраткан тәмлетамаклар әйтерсе дә оҗмахка эләкте диярсең... Ул гына да түгел, биредә төрлесеннән бал корты продуктларын сатып алырга да мөмкин иде. Бәйрәмгә килүчеләр зәвык белән бизәлгән, бай эчтәлекле бал продукциясе күргәзмәләре белән танышты, күңеленә хуш килгәнен сатып алды. Районның мәдәният йорты хезмәткәрләре матур концерт программасы тәкъдим итте.