Хәерле сәгатьләрдә башланып, уңышларга бай булсын!

2 сентябрь иртәсендә районыбызның 3230дан артык укучысы өчен яңа уку елы башлануын хәбәр итеп, мәктәп кыңгыраулары чыңлады. 277 кечкенә райондашыбыз үзләре өчен өр-яңа булган укучы статусына ия булып, мәктәп парталары артында урын алды.
Күркәм традиция буенча, Чакмагыш беренче урта мәктәбендә яңа уку елы Белем көненә багышланган тантаналы чара белән башланды. Быел биредә 880 укучы белем алачак. Мәктәп коллективын һәм укучыларны шушы якты бәйрәм белән котларга Чакмагыш авыл биләмәсе хакимияте башлыгы Марсель Хәдит улы Хәсәнов, муниципаль район Советы депутаты, Чакмагыш юл төзелеш-ремонтлау идарәлеге начальнигы Марат Тәлгать улы Мусин, район мәгариф бүлегенең юрист-консультанты Миләүшә Ринат кызы Кәримова килде.