Яңа йортка – яңа телевизор!

 

– Сайлауда тормыш иптәшем Фәнил белән катнашып,  ике билетлы булдык. Әниемә дә  сайлау ясаганнан соң билет тапшырганнар. Өч билетны да “Рахмат102.рф” сайтында теркәдек. Әниемнең билеты бүләк отучылар арасында булгач, аңа шалтыратканнар. Ә без аңа чит номердан шалтыратуларга җавап бирмә, мошенниклар бик күп хәзер, дип кисәтеп куйган идек. Әнием телефонга җавап бирмәгәч, район хакимияте аша миңа чыктылар. Аңа бүләккә телевизор отуы турында хәбәр иткәч тәүдә ышанмады. “Юк, булмас, кызым, дөрес түгелдер”, – диде. Аннан дөрес булганын аңлагач, әлбәттә, бик сөенде. Без Чакмагышта өй салабыз. Әни аны безгә бүләк итәргә булды. “Яңа өйгә миннән бүләк булыр сезгә, кызым”, – диде. Шулай итеп, без дә көтмәгәндә зур бүләкле булдык , – дип сөенече белән уртаклашты Резеда. 

Әйткәндәй, зур бүләккә ия булучы әңгәмәдәшем Тозлыкуш авылы модельле китапханәсендә китапханәче булып эшли, ә тормыш иптәше Фәнил Радик улы “Алга” авыл хуҗалыгы җитештерү колператив-колхозында баш агроном булып хезмәт сала. Тату гаилә  ике ул тәрбияләп үстергән. Данил быел 9нчы сыйныфны тәмамлап, урта һөнәри белем бирү институтының 1нче курс студенты, ә кечесе Дамир 6нчы сыйныфта укый. 

Бигрәк тә яңа өйгә күчкәндә яңа телевизорлы булу, әлбәттә, зур куаныч.  Бүләкнең игелеген күреп, бәхетле яшәгез, яңадан-яңа шатлык-куанычлар, көтелмәгән сөенечләрегез артып торсын. Әүфә апага да балаларын ихлас куандыруы өчен рәхмәтләр яусын, исәнлектә-саулыкта, балалар, оныклар шатлыгында озын-озак  гомер кичерегә язсын, дибез. Йортыгызда һәрвакыт тынычлык һәм иминлек хөкем сөрсен!