«Аек авыл» конкурсында быел Аблай авылы катнаша

“Аек авыл” республика конкурсы төбәктә Бөтендөнья башкортлары корылтае башлангычы белән 2019 елдан үткәрелә. Аның төп максаты ─ аек һәм сәламәт яшәү рәвешен популярлаштыру, халыкны иҗтимагый эшчәнлеккә җәлеп итү, игелекле эшләргә дәртләндерү.
Әлеге конкурс ярдәмендә Башкортстанда социаль әһәмиятле мәсьәләләр хәл ителә. Алкоголизм белән көрәшүдән тыш, конкурс төзекләндерү мәсьәләләрен хәл итүгә дә юнәлтелгән. Конкурс акчалары исәбенә җиңүче торак пункт¬ларда парклар, балалар мәйданчыклары, яңа коммуналь техника барлыкка килде, урамнар төзекләндерелде.
“Аек авыл” конкурсында районыбыз авыллары да ел саен катнаша. Быел әлеге конкурста аблайлылар көчләрен сынап караячак.
Шушы көннәрдә Аблай авылы мәдәният йортында «Аек авыл» республика конкурсының муниципаль этабын әзерләү һәм уздыру буенча оештыру комитеты утырышы булды.
Утырышта катнашучылар авыл халкы арасында аек һәм сәламәт яшәү рәвешен пропагандалауга юнәлдерелгән чаралар планын тормышка ашыру турында фикер алыштылар. Халыкчан, милли традицияләргә һәм гореф-гадәтләргә нигезләнгән иҗтимагый файдалы чаралар үткәрүгә игътибар бирелде.
Бу чара мәдәни йолаларны ныгыту гына түгел, сәламәт яшәү рәвешенең мөһимлеге турында хәбәрдарлык дәрәҗәсен дә күтәрергә мөмкинлек бирәчәк.
Моннан тыш, утырышта 2025 елның февралендә авылда узачак «Кышкы сабантуй» республика бәйрәменә әзерлек мәсьәләсе дә каралды. Бу бәйрәм авыл халкын һәм республиканың төрле почмакларыннан килгән кунакларны берләштерә торган истәлекле вакыйга булачак. Чара программасына бу бәйрәмгә хас традицион уеннар, җырлар, биюләр һәм йолалар кертелгән.
Утырышта катнашучылар билгеләп үткәнчә, бәйрәмгә әзерлек барлык җаваплы затларның бердәм эшләвен таләп итә. Программаның бурычларны билгеләү һәм үтәү сроклары турында фикер алыштылар. Көн тәртибендәге барлык мәсьәләләр буенча конкурсны һәм бәйрәмне уңышлы уздыруга юнәлдерелгән тиешле карарлар кабул ителде.
Утырыш волонтерларны һәм иганәчеләрне җәлеп итү планнары турында фикер алышу, шулай ук чараларны мәгълүмати озату стратегиясен эшләү белән тәмамланды. Оештыручылар уртак тырышлык белән авыл халкының сәламәтлеген һәм иминлеген ныгытуга ярдәм итә торган мөһим һәм якты вакыйгалар үткәреп булачагына ышаныч белдерделәр.