Буыннан-буынга мирас итеп

         Ныклы гаилә һәм тамырларыбызга хөрмәт – җәмгыятебезнең нигезе. «Гаилә кыйммәтләре һәм мәдәният инфраструктурасы» (“Семейные ценности и инфраструктура культуры”) федераль проекты нәкъ менә тарихи хәтерне саклауга, гаилә бәйләнешләрен ныгытуга һәм традицияләрне өлкән буыннан кече буынга тапшыруга юнәлдерелгән. Проектны гамәлгә ашыру чикләрендә Яңа Балтач мәдәният йортында балалар өчен   «Әбием сандыгы» интерактив программасы узды. Әби  сандыгы – ул авыл һәм шәһәр көнкүреше предметы гына түгел. Бу – зур мирас, гаилә хәтерен, зирәклеген һәм традицияләрен саклаучы, буыннан-буынга кадерләп тапшырыла торган чын җәүһәр.          Чара күңелле очрашудан башланды: алып баручы балалар алдында хәстәрлекле әби образында пәйда булды, ә залда балачактан ук таныш булган матур  музыка яңгырады. Яшьләр үткәнгә күчкәндәй булдылар. Балалар чын кызыксыну белән сандыкның «серләре» белән таныштылар. Алар кайчандыр шундый сандыкларда сакланган борынгы әйберләрне карадылар, ата-бабаларының ничек яшәгәнен аңларга тырышып, мәхәббәт белән эшләнгән һәр әйбернең кыйммәтен аңлап, бик күп сораулар бирделәр. "Санлы технологияләр чорында балаларга тарих турында уку гына түгел, ә аны күрү, куллары белән кагылу да мөһим. “Әби сандыгы” – ул безнең хәтер метафорасы. Мондый чаралар аша без үткәннәрнең көнкүреше турында сөйләп кенә калмыйбыз, балаларда өлкән буынга хөрмәт, үз тамырларыбызга мәхәббәт тәрбиялибез. Без аларның шуны аңлауларын телибез: гаилә истәлекләре һәм традицияләре – үткәннәрнең калдыгы түгел, ә аларның киләчәге төзелә торган нигез. «Гаилә кыйммәтләре һәм мәдәният инфраструктурасы» федераль проектының төп миссиясе нәкъ менә шунда тора да инде”, – ди Яңа Балтач мәдәният йорты мөдире Тәгъзимә Хәләф кызы,  яшь буын өчен мондый очрашуларның әһәмиятен ассызыклап.          Программа җылы аралашу һәм бергәләп истәлеккә фотосурәткә төшү белән тәмамланды. Мондый вакыйгалар мәдәни мохитне баерак һәм кешелекнең төп кыйммәтләренә – гаиләгә, үз чыганакларына мәхәббәт һәм хөрмәткә юнәлдерелгән итә.