Балаларның иминлеге – безнең төп бурычыбыз

Район территориясендә бүгенге көндә барлыгы 22 мәктәп автобусы исәпләнә.
Яңа уку елы алдыннан Чакмагыш районы Дәүләт автоинспекциясе хезмәткәрләре «Автобус» оператив-профилактик чарасы кысаларында мәктәп транспортына күләмле тикшерү үткәрделәр.
Дәүләт автоинспекторлары автобусларның техник торышын, «ГЛОНАСС-112» экстрен чакыру системасына рөхсәтнең, шулай ук барлык кирәкле документларның булуын җентекләп тикшерделәр. Көн саен балаларны ташучы транспорт чараларының хәвефсезлегенә аерым игътибар бирелде.
Муниципаль район хакимиятенең мәгариф бүлеге начальнигы Илдус Фидус улы Шәйдуллин мәктәп автобусларын йөртүчеләр белән профилактик әңгәмә үткәрде. Ул водительләрне юл хәрәкәте кагыйдәләрен төгәл үтәү мөһимлеге турында искәртте.
«Балаларның иминлеге – безнең төп бурычыбыз. Мәктәп автобусларын йөртүчеләр юл хәрәкәте кагыйдәләрен яхшы белергә генә түгел, шулай ук аларга йөкләнгән бөтен җаваплылыкны да аңларга тиеш. Юлда кечкенә генә игътибарсызлык та көтелмәгән хәлләргә китерергә мөмкин», – диде ул.
Инспекторлар автобусларны тикшергәндә без водительләр белән әңгәмә корып алдык. Чакмагыш беренче урта мәктәбе автобусы водителе Наил Фәнил улы Еникеев инде 15 елдан артык хезмәт сала. Фирзан Әүхәди улы Гыйрфанов әле беренче ел гына эшләүгә карамастан, зур хезмәт стажына ия. Димәк, мәктәп укучылары юлга чыкканда – ышанычлы кулларда.
Үткәрелгән тикшерү районының барлык мәктәп автобусларының хәвефсезлек таләпләренә туры килүен һәм укучыларны йөртергә әзерлеген күрсәтте. Әмма ЮХИДИ хезмәткәрләре, куркынычларны киметү һәм мөмкин булган кагыйдә бозуларны булдырмый калу өчен, уку елы барышында тикшерүне дәвам итәчәкләр.
Ата-аналар һәм педагогларның күңеле тыныч булсын, уку елы башланыр алдыннан балаларны хәвефсез йөртү өчен барлык чаралар да күрелгән. Автобус йөртүчеләргә яңа уку елында хәерле юллар телик!