Һәр күрсәткеч артында – кеше хезмәте

Районыбыз игенчеләре көзге имтиханнарын – урып-җыю эшләрен намус белән төгәлләп, хәзер бераз ял итәргә мөмкинлек алсалар, терлекчеләр өчен авыр “сессия” – озакка сузылган кышлату чоры дәвам итә.

Гыйнвар салкыннарында терлекчеләргә бер дә җиңел түгелдер, әмма алар сынатмый. Сөт җитештерү буенча республикада менә ничә ай инде иң алдынгы район булуыбыз шул хакта сөйли. Терлекчеләребез продукция җитештерүне арттыру юнәлешендә зур тырышлык куя. Бүгенге көндә хуҗалыкларда һәр сыердан 19,8 килограмм сөт савыла, район буенча 123 тонна сөт реализацияләнә. Бу уңышка “Победа” авыл хуҗалыгы кооперативы лаеклы өлеш кертә. Хуҗалыкта 995 баш мөгезле эре терлек исәпләнә, шуларның 369 савым сыерлары, 42 ат асрала. Терлекчеләр үткән елны ничек тәмамлаган? Агымдагы елның тәүге аенда күрсәткечләр нинди? Шушы көннәрдә Каразирек сөтчелек фермасында булып, иртәнге савым, терлекчеләрне кышлату барышы белән танышып кайттык.