Ил иминлеге – ир-егетләр эше

Хәрби хезмәткә китүчеләрнең тәүге төркемен район халкы күмәкләп озатып калды. Хәрби комиссариат алдында митинг үтте.

            Егетләргә үгет-нәсихәт биреп, исән-сау кайтуларын теләп муниципаль район хакимияте башлыгы Реканс Фәнил улы Ямалеев, хәрби комиссар Альберт Хәниф улы Хәбиров, Башкортстан Республикасы Дәүләт Җыелышы – Корылтай депутаты Вадим Васильевич Соколов, әфганчылар берләшмәсе җитәкчесе Рамил Рәшит улы Йосыпов, имам-хатыйб Фаяз хәзрәт Котлыев һәм иерей Евгений Ионов та  изге теләкләрен җиткерделәр.

            Мобилизация буенча барлыгы берничә дистә егет озатылды. Алар арасында үз теләкләре белән Ватанны сакларга барырга теләк белдерүчеләр дә күп.

            Ил сагына киткән егетләребез тәүдә махсус урыннарда хәрби әзерлек күнекмәләрен  яңартачак. Артабан изге бурычларын билгеләнгән урыннарда үтәячәк.

            Бирелгән изге антларына тугры калып, Чакмагышта туып-үскән батыр ир-егетләр ил чикләрен сакларга китте. Хезмәтегезне намуслы үтәп, исән-сау әйләнеп  кайтыгыз, без сезне көтәбез, егетләр! Хәерле сәгатьтә!