36нчы гуманитар йөк юлга кузгалды

 Бердәмлек, ярдәмчеллек, мәрхәмәтлелек авырлыклар килгәндә сынала. Шушы көннәрдә чакмагышлылар яугир-якташларыбызга  чираттагы гуманитар ярдәмне озатты. Илебез мәнфәгатьләре хәл ителгән әлеге операциягә битараф булмаган төрле яшьләрдәге райондашларыбыз,  районыбыз оешма-учреждениеләре вәкилләре, шәхси эшкуарлар, авыл хуҗалыгы предприятиеләре ярдәм күрсәтү теләген белдереп, бу изге эштә актив катнаша. Алар өчен кыска гына вакыт эчендә төрле транспорт чаралары (УАЗ, Нива, өч ВАЗ автомобиле,  мотоцикллар) генераторлар, маскировкалау челтәрләре, азык-төлек, шәхси гигиена чаралары, шулай ук башка кирәк-ярак әзерләп җибәрелде.
Көмеш волонтерларыбызның ярдәм итә башлауларына да бик күп вакыт үтте инде. “Их, икеләнеп торганчы, мин дә баштарак тотынган булсам, күпме эшләр башкарган булыр идем, күпме ярдәмем тигән булыр иде  егетләребезгә”, – дигән чаклары аз түгел апаларның. Тиз дә җитез дә бит алар. Волонтёрлар штабында илебез мәнфәгатьләрен яклаучы игетләребезгә маскировка челтәрләрен үрү буенча эшчәнлек бер минутка да тынып тормый. Алар әлеге гуманитар йөк белән алгы сызыкка озатылды. “Теләктәшлек белдерүчеләребез гел артып торсын иде, бу бик саваплы эш, туктамасын, дәвам итсен, – ди алар. –Рәхмәт ярдәмчел кешеләргә, әлеге эшләрне башкарырга кирәкле бөтен әйберне китереп, юнәтеп торалар”.
Иң мөһиме, афәтләр бетсен, дөньялар тынычлансын! Егетләребез исән-сау туган якларына әйләнеп кайтсыннар. Ихластан әзерләнгән ризыклар егетләребезгә барып җитсен! Гуманитар йөкне озата баручыларга хәерле юллар телик.
Лиана Ханмурзина.